Агенцијата за финансиска поддршка во земјоделството и руралниот развој соопшти рокот за поднесување на барања за субвенции се продолжува за еден месец, па наместо до 31 мај, барањата земјоделците ќе може да ги поднесуваат до 30 јуни 2019 година.
Ова продолжување на рокот е по барање на земјоделците, со цел да можат сите да го искористат правото.
„До овој рок, земјоделците ќе можат да ги поднесуваат барања по Програмата за финансиска поддршка во земјоделството за 2019- та година, односно за директни плаќања за растително производство и тоа за површини со поледелски и градинарски култури, лозови и овошни насади како и за сточарско производство и тоа за одгледување на говеда, овци, кози, пчели, свињи, и за заклани животни во кланица“, соопштуваат од Агенцијата.
Барањата за субвенции се поднесуваат по електронски пат, самостојно од страна на барателите. Оние кои не знаат сами да поднесат барање или имаат потреба од помош може да се обратат во подрачните единици на Министерството за земјоделство, шумарство и водостопанство.
„Барањата за мерките од растителното производство се поднесуваат врз основа на евидентирани податоци за парцели во Единствениот регистар на земјоделски стопанства и Системот за идентификација на земјишни парцели со состојба на 15 март 2019 година. Барањата за мерките од сточарското производство за говеда, овци, кози и пчели се поднесуваат врз основа на евидентирани податоци за животни во Регистарот за идентификација и регистрација на домашни животни со состојба на денот на поднесување на барањето. Одгледувачите на добиток пред поднесување на барањето задолжително треба да ја проверат и по потреба ажурираат состојбата на животните во ветеринарното друштво со кое имаат склучено договор, како и да ја ажурираат состојбата во Агенцијата за хрна и ветерина“, потсетуваат од Агенцијата.
Оттаму апелираат и сите корисници на оваа финансика поддршка по аплицирањето и добивањето на отпечатениот примерок добро да ги проверат податоците и ако има одредени отстапувања во рок од 30 дена од денот на аплицирањето да ги извршат потребните корекции.
