Настапот на Мадона на натпреварот за песна на Евровизија организаторите го доведуваат во прашање бидејќи, како што наведуваат, не потпишала ниту договор за настап, пишува Би-би-си.
Извршниот супервизор на Евровизијата Јон Ола Санд изјавил во понеделникот дека „Европската радиодифузна унија никогаш не го потврдила настапот на Мадона“.
– Ако немаме потпишан договор, таа не може да настапува на нашата сцена – прецизирал тој.
Натпреварот се одржува на 18 мај во Тел Авив, Израел.
Појавувањето на Мадона на евровизиската сцена го објавија во април нејзините американски и британски публицисти.
Тие рекоа дека музичката ѕвезда би требало да изведе две песни во текот на Евровизијата – една од својот нов албум „Мадам Икс“ и уште една од нејзиниот каталог „Like A Prayer“ од 1989 година.
– Сега преговараме, во завршна фаза сме. Но, ако оваа недела не дојде до потпишување на договорот, таа нема да се појави на сцената – рекол Санд.
Според пишувањето на „Ерусалем пост“, Мадона ќе пристигне во Тел Авив в среда за да присуствува на пробите.
Не е јасно како Евровизија ќе ја пополни емисијата ако нејзиниот настап биде откажен.
