Над 350 претставници од целиот свет се очекува да учествуваат на Самитот на европски слободни економски зони, кој во организација на Дирекцијата за технолошко-индустриски развојни зони ќе се одржи од денеска до 4 мај во Скопје.
Самитот се организира во соработка со Организацијата на светски слободни зони.
Директорот на Дирекцијата на ТИРЗ Александар Младеновски неодамна на брифинг најавувајќи го Самитот истакна дека на него ќе учествуваат претставници од речиси цел свет, од Колумбија до Казахстан, Европа и други континенти.
Државната помош и нелегалната трговија во зоните ќе бидат само некои од темите на Самитот, а ќе се потпише и меморандум за соработка со светските економски зони со цел, како што истакна, земјава да биде опфатена во т.н. безбедни зони.
За денеска е најавено отворањето на Самитот во попладневите часови. Настанот ќе го отвори Младеновски со поздравно обраќање, а главните активности се предвидени за утре во хотелот Александар Палас, кога ќе се одржи министерски панел, на кој ќе учествува министерот за економија Крешник Бектеши и уште тројца министри од земји од регионот. За утре се планирани и три панел дискусии посветени на „Иднината на слободните зони и предизвиците со кои се соочуваат“, „Нелегална трговија и нејзините ефекти врз на слободните зони и нивните безбедни програми“ и „Формирање здружение кое ќе ги опфати сите видови зони“. За 4 мај е предвидена посета на слободната економска зона во Скопје.
