Грчкиот премиер, Алекис Ципрас во обраќањето на вториот форум на високо ниво на модерниот „Пат на свилата“ во Пекинг, рече дека Грција и соседството треба да бидат мост меѓу Западот и Истокот.
– Мојата земја денес ја користи и сака да ја искористи нејзината уникатна геополитичка позиција на среќавање на трите континенти, како и нејзината улога како сила со светско влијание во поморството и туризмот. Сакаме нашето соседство, Југоисточниот Медитеран, но и Балканот да не бидат граница помеѓу Запад и Исток, туку да биде мост меѓу Западот и Истокот, истакна грчкиот премиер.
Во оваа насока рече дека регионот треба да стане „светски јазол на транспортот, енергијата и трговијата“, а ја спомена и кинеската инвестиција на компанијата Коско на атинското пристаниште Пиреас, што „игра централна улога во напорите“.
-Пристаништето Пиреас станува глобална порта кон Европа за производи што доаѓаат од кинески и азиски пристаништа преку Суецкиот канал. А наша цел е да се поврзе со транспортните мрежи на Балканот и Источна Европа. Особено со мрежите кои брзо се развиваат од оската Грција -Бугарија- Романија кон Црното Море, но и Грција, Северна Македонија и Србија, рече грчкиот премиер и изрази надеж дека интерконективните мрежи дополнително ќе се зајакнат со кинески инвестиции во Грција.
