Лекар во Тајван пронашол четири минијатурни пчели кои живееле во окото на пациентка, и се хранеле со нејзините солзи.
28-годишната Хе работела во градината, вадела коров, кога пчелите ѝ влетале во окото и таму останале да престојуваат. Со оглед на тоа дека дувнал ветер, таа мислела дека во очите ѝ влегла земја. Меѓутоа, неколку часа подоцна, очите ѝ биле отечени и болни, поради што морала да побара лекарска помош.
Офталмологот Хонг Чи Тинг раскажал за Би-би-си дека бил шокиран кога ги извлекувал 4 мм долгите пчели од нејзините очи.
Лекарот под капакот на окото, со микроскоп видел дека нешто се движи, по што утврдил дека се работи за пчели.
Пчелите се отстранети, а овој медицински случај е опишан како прв таков во светот, пишува „Индепендент“.
Девојката е отпуштена од болница и се очекува целосно да закрепне. Пчелите биле привлечени од човечката пот па понекогаш слетуваат на луѓето за да се нахранат. Но, како што покажале некои студии овие инсекти ги пијат и нашите солзи, бидејќи тие содржат висок процент на белковини.
– Не можела целосно да ги затвори очите. Ја прегледав под микроскоп и видов дека во нив има нешто црно што изгледаше како нога од инсект. Го фатив за ногата и полека го извадив, а потоа видов уште една нога, па втора, па трета. Сите пчели беа живи – рекол офталмологот.
