Војската на Венецуела денеска употреби солзавец во близина на границата со Колумбија против група луѓе кои се обидувале да преминат во таа соседна земја за да одат на работа.
Владата на претседателот Николас Мадуро ги затвори границите додека опозициските лидери се подготвуваат да ја примат хуманитарната помош од САД, на што се спротивставува владејачката Социјалистичка партија.
Венецуелските власти наредија распоредување војска во близина на границата со Колумбија, соопшти денеска Стратешката оперативна команда на Боливарските национални вооружени сили.
„Следејќи ги инструкциите на нашиот врховен командат Николас Мадуро, командантот на Стратешката оперативна команда на вооружените сили Ремиџо Себаљос нареди распоредување на војската на границата меѓу Колумбија и Венецуела со цел гарантирање на мирот и безбедноста на граѓаните по затворањето на границата“, се наведува во соопштението објавено на Твитер.
Во четвртокот Мадуро нареди затворање на границата со Бразил, а вчера потпретседателот Делси Родригес нареди привремено затворање на трите моста кои ја поврзуваат Венецуела со Колумбија.
Во меѓувреме, припадници на градата и на венецуелските безбедносни сили дезертираат и пребегнуваат во Колумбија. Последните информации се дека најмалку 13 од нив веќе пребегнале. Десет членови на Националната гарда и двајца полицајци ја преминале границата и влегле во колумбискиот регион Норте де Сантандер, од каде венецуелската опозиција се обидува да донесе хуманитарна помош во земјата, рече портпаролот.
ФОТО: EPA / Cristian Hernandez
