Турските власти приведоа 641 лице поради наводна поврзаност со движењето на Фатулах Ѓулен, за кого Анкара смета дека го организирал обидот за преврат во 2016 година.
Турските власти денеска издадоа налози за апсење на 1.112 лица во рамки на истрагата за наводни измами на испит во 2010 година, со што им е овозможено на полицајци да станат заменици полициски инспектори. Обвинителството тврди дека прашањата пред тестот им биле поделени на следбеници на Ѓулен, кој живее во доброволен егзил во САД.
Ова е една од најголемите операции против мрежата на Ѓулен по неуспешниот државен удар.
Полицијата покрена симултани операции во Анкара и во уште 75 провинции.
Од неуспешниот државен удар, досега се уапсени околу 77.000 луѓе, а 130.000 се отпуштени од работа.
Ѓулен, од своја страна, негира дека имал каква било поврзаност со обидот за државен удар.
