Прогласена е епидемија на мали сипаници во Скопје и принудени сме од утре да донесеме привремена мерка – забрана за носење на деца кои не се вакцинирани со МРП вакцина во градинките, рече министерот за здравство Венко Филипче, на денешната прес конференција.
Епидемијата на морбили на територија на градот Скопје е прогласена поради 12 нови случаи. Филипче информира дека шест од новите случаи се потврдени со соодветни анализи, а за останатите 6 анализите се очекуваат утре. Тој додаде дека меѓу новите случаи повеќето се деца, но има и возрасни, а сите се невакцинирани лица со МРП вакцината.
Од новите случаи има по еден заболен во Кисела Вода, Гази Баба и Аеродром, а тројца во Бутел. Од сомнителните случаи двајца се во Аеродром, по еден во Центар, Бутел и Ѓорче Петров.
Осум од заразените се хоспитализирани на инфективна клиника и сите се со компликации со бронхопневмонија. Двајца се со потешка клиничка слика. Меѓу заболените има 8-месечно бебе и деца на возраст од 3,5 и 4 години. Има и еден возрасен на 31-годишна возраст.
Министерот додаде дека здравствените власти ја држат ситуацијата со малите сипаници под контрола и дека се прават увиди на сите пунктови за вакцинирање.
– Од 15.000 невакцинирани деца под 14 годишна возраст со повиците за вакцинирање, само 310 се вакцинираа што е исклучително мала бројка – рече Филипче.
Во Скопје во моментов се регистрирани 13 случаи на морбили, а се очекува потврда за уште 6. Филипче најави дека ќе се истражува дали педијатри им давале совети на родители да не ги вакцинираат децата со МРП до 3 годишна возраст.
Лекарите ја критикуваат антивакциналната кампања и апелираат да не се одложува вакцинирањето. Тие потсетуваат на законската одредба дека следуваат казни од 350 до 650 евра за невакцинирање.
Од Институтот за јавно здравје велат дека пред 1972 година имало епидемии со преку 1250 смртни случаи и над 12 илјади заболени, пред да се воведе вакцината.
Морбилите се сметаат за тешко заболување, може да предизвикаат тешко воспаление на белите дробови и менингитис.
