Компанијата „Мермерен комбинат“ од Прилеп ги најави новите инвестициски планови за дополнителен развој и нивните намери да вложуваат и во други области, особено во енергетиката, во делот на производство на електрична енергија од обновливи извори.
Како што информира владината прес-служба, за ова денеска разговарале премиерот Зоран Заев и делегација на сопствениците и на менаџментот на компанијата „Мермерен комбинат“ од Прилеп.
На средбата во Кабинетот на премиерот, како што се наведува, присуствувале и вицепремиерот за економски прашања и за координација со економските ресори Кочо Анѓушев и министерот за транспорт и врски Горан Сугарески, а во името на сопствениците на компанијата, Христофорос Павлидис информирал за тековните бизнис активности на компанијата „Мермерен комбинат“.
Премиерот Заев ги поздравил намерите на компанијата да вложува во осовременување на технологијата за производство и во производството на готови производи и нагласил оти како и секоја друга компанија, и „Мермерен комбинат“ може да очекува поддршка од владините програми за развој на бизнисот, особено кога станува збор за инвестициски вложувања што отвораат нови и добро платени работни места.
Заев истакнал дека секоја средба со претставниците на компаниите со странски капитал е добредојдена за усовршување на моделите за соработка со владините институции и за надминување на прашањата кои произлегуваат од работењето.
– Секое искуство и препораки што доаѓаат од бизнисот и од компаниите со странски капитал, и нивните успешни приказни, истовремено се и пораки за потенцијалните и идните инвеститори и за нас се многу важни – нагласил премиерот Заев на средбата со сопствениците и со менаџментот на компанијата „Мермерен комбинат“ од Прилеп.
