Интерконекторот за гас со Грција и граничниот премин Табановце како дел од Коридорот 10 во државава се дел од проектите коишто ќе бидат поддржани со 194 милиони евра неповратни средства од ЕУ и билатералните донатори за Западен Балкан. Одлуката за одобрување на новите средства е донесена синоќа на состанокот на Управниот одбор на Инвестициската рамка за Западен Балкан, чиј менаџер и еден од основачите е Европската банка за обнова и развој (ЕБРД).
Поддршката се однесува за проекти во областа на дигиталната инфраструктура, животната средина, транспортот и енергетиката.
Неповратните средства одобрени за проекти за земјите од Западен Балкан ќе привлечат уште 400 милиони евра инвестиции од ЕБРД, а освен двете делници на Коридорот 10, тука се вклучени и изградба на три нови делници од автопатот во БиХ, обнова на косовската железничка инфраструктура, системите за отпадни води и канализациска мрежа во Гњилане и изградба на широкопојасна интернет мрежа за училиштата во руралните средини во Србија.
Покрај оваа одлука, ЕБРД и ЕУ потпишаа и договор за дополнителни 45 милиони евра за две програми кои оваа меѓународна банка ги спроведува во земјите од регионов – Совети за мали претпријатија, како и Регионална програма за енергетска ефикасност за подобрување на енергетската ефикасност во станбениоот сектор и во јавните згради, а се спроведува со поддршка на Германската развојна банка.
Вкупниот износ на неповратни средства кои досега ги определиле ЕУ и билатералните донатори за Инвестициската рамка за Западен Балкан надминува милијарда евра, додека вкупните вложувања на меѓународните финансиски институции изнесуваат над 5,6 милијарди евра.
