Иако географски оддалечени, двете држави негуваат одлични билатерални односи и остваруваат соработка во различни области, истакна Донг Јунху, претседател на Шангајскиот комитет на Кинескиот народен политички консултативен совет по средбата со претседателот на Собранието Талат Џафери кој ја предводи македонската делегација при посетата на Шангај, Кина.
Јунху подетално ги запознал гостите со развојот на Шангај и со неговата улога на лидер во земјата по реформите и иновациите и изрази подготвеност за споделување на сите искуства и добри практики. За одржувањето на ЕКСПО за извоз и увоз кој до крајот на годината треба да се одржи во Шангај, Донг истакна дека би сакал и Република Северна Македонија да учествува и да ги претстави своите производи и услуги на светскиот саем.
Претседателот Џафери изрази задоволство што односите меѓу Република Северна Македонија и Народна Република Кина се развиваат во духот на пријателството, меѓусебното разбирање и заемното почитување а фактот што официјалната посета на НР Кина започнува во Шангај, го оцени како своевидно охрабрување за продлабочување на економската соработка меѓу Македонија и Кина.
Тој нагласи дека, парламентите, владите и другите институции треба постојано да вложуваат напори за создавање на широка рамка на билатерални спогодби кои создаваат поволни услови за соработка во повеќе области. Запознавајќи ги домаќините со актуелните случувања на домашната политичка сцена како и со надворешно политичките стратешки определби на државата, претседателот изрази надеж дека до крајот на годината Македонија ќе стане 30 земја членка на НАТО и дека до крајот на месецот ќе добие датум за почеток на преговори со Европската Унија.
Двајцата соговорници изразија уверување дека добрите политички односи ќе бидат добра основа за понатамошно развивање на економските односи, како на билатерално ниво така и во рамките на Процесот за соработка 17+1 на НР Кина и земјите од Источна и Централна Европа.
Делегацијата на Собранието на Република Северна Македонија имаше можност да го посети и Центарот за урбано планирање на градот Шангај, кој има население од 24 милиони жители и се протега на површина од 660 километри квадратни а својот најголем развој го доживува во последните 20 години. Беше претставено и функционирањето на локалните центри и начинот на кој се решаваат урбаните проблеми, а кој како модел се применува и во останатите градови во НР Кина.
Во делегацијата предводена од Џафери се потпретседателот Горан Мисовски, координаторите на пратеничките групи на СДСМ Јован Митрески, на ДУИ Ејуп Алими, на ВМРО-ДПМНЕ Никола Мицевски, претседателот на Пратеничката група за соработка со Народна Република Кина, Владанка Авировиќ и генералниот секретар на Собранието Цветанка Иванова.