Се бара компромисно и итно решение за сообраќајниот метеж кој се создава во Клиничкиот кампус, но и за протокот на возила по булеварите кои водат до Клиниките. За ова било разговарано вчера на координативен сотанок меѓу министерот за здравство Венко Филипче со претставници од секторите за сообраќај при Општина Центар и Град Скопје, Министерството за внатрешни работи, Регионалниот центар за управување со сообраќај и со вработени од Итната медицинска помош.
Еден од најважните заклучоци е да се овозможи „зелена траса“ по булеварите кои водат до Клиничкиот центар за потребите на возилата на Брзата помош, кои ќе имаат свој посебен влез и лента за непречено движење.
Се разговарало и за можноста да се врати двонасочниот сообраќај на малата сервисна улица Герман која го спојува излезот на Клиничкиот центар и раскрсницата кон ТЦ „Рамсор“ и излегува на улицата Јордан Мијалков, како и за можноста да се врати двонасочниот сообраќај и на улицата 50 Дивизија која се спојува со Водњанска и цел ден е тесно грло.
Со Пробивање на нова пристапна улица низ поранешниот студенски дом „Медицинар“, ќе се подобри пристапноста и излезот од Клиничкиот центар.
Се разгледала и можноста главниот влез на Клиничкиот центар да биде дислоциран и да биде поставен во близина на стоматолошките клиники, со цел да се намали притисокот на возилата кои сообраќаат по булеварот Мајка Тереза, поранешна Водњанска, особено во период кога има посебен режим, кога сообраќаат возила на делегации. На тој начин ќе се ослободи и досегашниот главен влез за полесен пристап на возилата на брза помош.
Со проширување на влезот кај местото познато како „Тасино чешмиче“, ќе се олесни влезот на возилата при влез во Клиничкиот кампус, кај Клиниката за детски болести.
Низ сервисните улички во Кампусот, ќе се постават столпчиња со цел да се спречи непрописно паркирање и да се овозможи непречено движење на пешаците и инвалидизирани лица низ Клиничкиот центар.
Ќе се искорнат пенушките кои се оставени на поголемиот дел од пешачките патеки и тротоари, со што истите се блокирани и е невозможно да се движат пешаците.
Деновиве ќе бидат поставени и сообраќајни знаци за правилно насочување на сообраќајот.
Дел од коловозните ленти ќе бидат скратени во широчина, бидејќи со помош на столпчиња ќе биде формирана нова лента по која ќе се движат исклучиво интерклинички носила и лица со инвалидни колички.
Договорено е поставување на неколку монтажни паркиралишта, на соодветни места кои однапред се мапирани дека се соодветни. По поставуањето на овие гаражи, ќе биде строго забрането паркирањето надвор од нив, освен на места кои ќе бидат одбележени за таа намена.
Поради овие големи неопходни зафати, за надминување на сообраќајниот метеж, ќе бидат хортикултурно уредени сите слободни површини. Ќе бидат отстранети сите стебла кои се стари и се ризик по пациентите кои се движат низ кампусот, но и постои можност да оштетат објекти и возила. Особено ќе се води сметка за поставување на садници и зелени површини кои ќе бидат тампон зона меѓу Клиниките и местата за паркирање.
Со воведување на сообраќаен и пешачки ред во Кампусот, ќе биде олеснето движењето на сите кои имаат потреба или се движат на овој потег. Безбедноста и брзината на движењето во болницата се приоритети, особено за итните случаи.
Со намалување на метежот ќе се намали и аерозагадувањето и протокот на возилата низ Кампусот.
