Претставата „Хари Потер и проколнатото дете“, која е закажана за 22 април, ќе биде најскапата драмска продукција во историјата на Бродвеј. Трошоците за изведување изнесуваат вртоглави 68,5 милиони долари.
– Станува збор за голема сума, но тоа е Хари Потер, еден од најпопуларните брендови во историјата – објасниле надлежните, додавајќи дека сметаат дека претставата ќе биде хит, па затоа и потрошените милиони се добра инвестиција.
Претставата е работена по сценарио што со писателката Џ.К. Роулинг (52) го работел Џон Тифани. Претставата е во два дела и би требало да трае повеќе од пет часа. Дејството се одвива 19 години по последната книга, а Хари работи во Министерството за магии и е татко на три деца.
Истата претстава на престижниот лондонски театар Вест Енд е целосно распродадена 22 месеци по ред.
