Косовскиот премиер Рамуш Харадинај соопшти дека Косово ја прекина комуникацијата со Мисијата на Обединетите нации во Косово (УНМИК), додавајќи дека писмата што оваа Мисија ги праќа до ОН „не се одраз на вистината“.
Како што јави Радио Слободна Европа, изјавата на Харадинај следи откако генералниот секретар на ОН, Антонио Гутереш оцени дека најголем проблем во односите помеѓу Белград и Приштина е таксата од сто отсто на српската стока.
– Ние не комуницираме повеќе со нив. Луѓето на УНМИК ги пишуваат тие писма и ги праќаат таму. Не сметам дека тоа е одраз на вистината. Тензиите помеѓу Косово и Србија, ако сакаме така, ги создаде војната, нанесените штети и големата болка, како и нерешавањето на односите со еден договор за признавање. Додека нема договор, нормално е дека ќе има тензии – рече Харадинај за време на посетата на фабриката за преработка на компири во Вучитрн.
Харадинај, исто така, нагласи дека нема да има никакви корекции на границата меѓу Косово и Србија и дека Приштина е подготвена за договор кој ќе ги регулира сите теми, а не за договор чија цел се територии и граници.
Претседателот на Косово, Хашим Тачи, претходно во Њујорк изјави дека корекцијата на границата ќе биде дел од конечниот договор помеѓу Косово и Србија. Тој повтори дека Косово е подготвено за дијалог, но без условувања.
