Министерството за финансии информира дека во јануари фирмите добија 2,2 милијарди денари поврат на данок за додадена вредност (ДДВ), или 35,7 милиони евра. Ова, според чуварите на државната каса, е за 315 милиони денари или 16,8 отсто повеќе во однос на истиот месец лани.
– Редот кој го воспоставивме со повратот на ДДВ, односно обезбедувањето на редовен и неселективен – автоматски поврат, е значаен за подобрување на ликвидноста во стопанството. Со тоа се обезбедува нормално работење на фирмите, но и се стимулира инвестициската активност – вели министерот за финансии Драган Тевдовски.
Во насока на обезбедување на автоматски поврат на ДДВ, Управата за јавни приходи направи и Модул за автоматски поврат и пребивање даноци кон сите даночни обврзници, кој ќе биде имплементиран во текот на годинава.
Лани, Министерството за финансии извршило вкупно поврат на ДДВ кон фирмите во износ од 375,6 милиони евра, што претставува 60 милиони евра повеќе во однос на 2017 година.
