Премиерот Зоран Заев денеска ќе присуствува и ќе се обрати на отпочнувањето на изградбата на фабрика на турската компанија „Мурат Тиџарет“ во ТИРЗ Скопје 2.
Покрај премиерот, како што соопшти владината прес-служба, ќе се обратат и вицепремиерот задолжен за економски прашања Кочо Анѓушев, министерот за економија Крешник Бектеши, министерот за финансии Драган Тевдовски, директорот на Дирекцијата на ТИРЗ, Александар Младеновски и Ејул Ѓулсој, директор на компанијата „Мурат Тиџарет“.
Компанија планира да инвестира 6,6 милиони евра за изградба на фабрика за производство на кабли со површина од 18.000 квадратни метри во Технолошко-индустриската развојна зона Скопје 2.
Компанијата е специјализирана за производство на електрични кабли за автомобилската индустрија и планира да отвори 300 нови работни места во првата фаза. Производството е наменето за извоз на европскиот пазар.
Договорот за закуп на градежно земјиште во Технолошко-индустриската развојна зона Скопје 2 во декември лани го потпишаа директорот на Дирекцијата за технолошки индустриски развојни зони Александар Младеновски и генералниот директор на компанијата Мурат Тиџарет, Ејуп Гулсој.
Се очекува фабриката да биде изградена до крајот на 2018 година.
„Мурат Тиџарет“ е добавувач на производи за голем број компании од автомобилската индустрија и вработува 2.200 луѓе низ светот.
