Американскиот претседател Доналд Трамп не мисли дека севернокорејскиот лидер Ким Џонг-ун бил вмешан во смртта на американскиот студент Ото Вормбир, кој почина откако отслужи затворска казна во Северна Кореја.
– Тој ми рече дека не знае ништо за тоа и му верувам на зборот, изјави американскиот претседател во Ханој, каде што се сретна со Ким.
Трамп ги презеде заслугите за ослободување на американски затвореници од други земји, а смртта на Вормбир ја користеше како доказ за кршење на човековите права во Северна Кореја, пред да „омекне” кон Ким, пишуваат американски медиуми.
Вормбир беше студент од американската држава Охајо и беше осуден на 15 години тешка работа во 2016 година, под сомнеж дека украл пропаганден постер во Северна Кореја. Почина во јуни 2017 година, откако беше испратен дома од севернокорејски затвор во кома.
Неговите родители веруваат дека тој бил измачуван.
Photo: EPA / JIM LO SCALZO
