На интернет протече тајно направена видео снимка на која може да се слушне како директори на интернет гигантот „Гугл“ изразуваат жалење поради победата на Доналд Трамп на претседателските избори во САД во 2016 година.
На снимката може да се слушне еден од основачите на „Гугл“, Сергеј Брин како вели дека „ова не е најсреќниот петок што сме го имале, многу луѓе се лути и тажни поради изборите“, зборувајќи пред група насобрани директори на Гугл.
На снимката може да се види дека се работи за редовниот петочен состанок во Гугл.
Снимката беше објавена на екстремно десничарскиот интернет порталот Брајтбарт, кој го поддржува Трамп.
Објавувањето на снимката доаѓа во време кога Трамп обвини повеќе интернет гиганти, а пред се „Гугл“, дека свесно ги манипулираат резултатите кога јавноста пребарува податоци на интернет, кријат информации кои ги поддржуваат ставовите на десницата, а промовираат ставови кои се критични за Трамп.
„Гугл“ без конкуренција е најголемиот интернет сервис за пребарување податоци и вести на светската мрежа и Трамп обвини дека политичката пристрасност на раководството на оваа компанија, ситуирана во лево ориентираниот крајбрежен појас на Калифорнија, може сериозно да влијае врз политичките случувања во САД.
ФОТО: EPA-EFE/JOHN G. MABANGLO
