Косовскиот претседател Хашим Тачи ја поддржа иницијативата на парламентарниот спикер Кадри Весели за формирање меѓународен суд за српските воени злосторства во Косово, оценувајќи дека тоа е „најумната работа што може да ја направи Собранието на Косово“, јави дописникот на МИА од Приштина.
Тачи, пред продолжувањето на денешната собраниска седница, на која треба да се расправа за предлогот на Весели за комисија која ќе работи на формирањето на судот, побара сите политички субјекти да се обединат за осуда на српскиот геноцид во Косово, со цел сторителите на злосторствата да се изведат пред правдата.
– Денешната дебата и можноста за изгласување резолуција и формирање на комисија е најумната работа што може да ја направи Собранието на Република Косово. Тоа е мошне добра идеја на претседателот Весели и верувам дека сите ќе бидат обединети во осудата на геноцидот и етничкото чистење од страна на Србија, за луѓето кои ги извршиле тие злосторства, луѓето од државниот апарат на Србија да излезат пред правдата, изјави Тачи.
