Косовскиот претседател Хашим Тачи оцени дека дијалогот со Србија е тежок, но оти е едениствен пат да се оди напред.
На форумот „Идната декада на Косово: Унапредување на реформите, регионалната соработка и европската интеграција”, Тачи изјави дека следните денови и недели ќе бидат одлучувачки за консолидирање на Косово како држава.
Тој ги поздрави платформата предложена од претседателот на парламентот Кадри Весели за општ политички консензус за прашања од национален интерес, како и платформата на Владата за финализирање на дијалогот со Србија.
– Добредојдени се и ги поздравувам платформите што ги предлагаат политичките лидери, посебно за да постигнеме консензус за последната фаза од дијалогот меѓу Косово и Србија. Обврзувачкиот договор е во полза на двете земји. Тоа го олеснува патувањето кон ЕУ. Знам дека дијалогот со Србија е многу тежок, исто како и посветеноста за помирување, но ова е единствениот начин да се оди напред,истакна Тачи.
Тој посочи дека косовската политика има потреба од длабоки реформи, додавајќи дека е уверен оти втората деценија од независноста на Косово ќе донесе членство на земјата во НАТО.
