Легендарниот композитор Енио Мориконе, кој има работено со Квентин Тарантино и доби Оскар за најдобра музика за „Омразените осум“, во интервју за германското издание на „Плејбој“ изјавил дека Тарантино е „кретен“, а неговите филмови се „ѓубре“, објавија светските медиуми, меѓу кои и „Форбс“.
– Тој не е режисер. Во неговата работа нема ништо оригинално. Не можете да го споредите со холивудски режисери како Џон Хјустон и Алфред Хичкок. Тие беа неверојатни. Тарантино само готви познати јадења. Тој е хаотичен и сè прави во последен момент. Ми се јавува неочекувано, барајќи музиката за филмот да биде готова за неколку денови. Тоа ме излудува затоа што е невозможно. Нема да го трпам повеќе и му го кажав тоа – наводно додал Мориконе во интервјуто, што самиот композитор сега категорично го негира.
Во изјава Мориконе не само што негира дека го навредувал Тарантино, туку тврди и дека никогаш не дал интервју за германски „Плејбој“ и се заканува со тужба.
– Тотална измислица. Мојот адвокат ќе поведе правна постапка. Тарантино го сметам за одличен режисер – се вели во изјава на Енио Мориконе што ја пренесува „Варајати“, додека од германски „Плејбој“ сè уште немало реакција.
