Со сто илјади долари-грант од Амбасадорскиот фонд на САД во наредните две години комплетно ќе се ревитализира и конзервира манастирот „Света Богородица Елеуса“ во селото Вељуса, кај Струмица. Договорот за користење на грантот во дворот на манастирот го потпишаа амбасадорката на САД во нашата земја, Кејт Мари Брнз и министерот за култура, Хусни Исмаили.
Грантот за реставрација и зачувување на црквата и нејзините фрески е дел од постојаната програма на Стејт Департментот на САД, познат под името Амбасадорски фонд за културна заштита.
– Овој извонреден споменик е потврда за богатата и трајна историја на Северна Македонија. Црквата „Света Богородица Елеуса“ стои овде повеќе од илјади години, а некои од фреските датираат од пред осум века. Замислете ги илјадниците посетители кои поминале низ овие простории за да искажат восхит и биле трогнати од овие цртежи. Верници, свештеници, аџии, кралски семејства, туристи и обични граѓани нашле утеха и инсипирација во овие уметнички дела во изминатите осум века – рече амбасадорката Кејт Мари Брнз во своето обраќање.
Министерот за култура, Хусни Исмаили истакна дека не може да го сокрие задоволството што ќе се реставрира овој црковен бисер, кој е денес е еден од најрепрезентативните споменици на уметноста од средно византиската епоха зачувани на македонската територија.
– Црквата е основана пред крајот на 11 век, дарувана со многу феудални привилегии и скапоцености. Нејзините градители имаат влијание од современите архитектонски решенија од византиската престолнина и се одраз на непосредните влијанија од цариградската градителска традиција – истакна министерот за култура, Хусни Исмаили.
Гостите ги поздрави викарниот епископ отец Јаков од Струмичката епархија на МПЦ-ОА, кој ја истакна големата благодарност до амбасадата на САД за чувството за грижа, не само за културното наследство тука, туку и насекаде низ светот. Додаде дека црквата „Света Богородица Елеуса“ е своевидно архитектонско чудо во светски рамки и сведочи за архитектурата и уметноста која се негувала во 11 век и единствена од тој тип во нашата држава.
