Брзото менување на законите често води кон импровизирање и донесување на законски решенија кои се неприменливи во практика и тешки за толкување, велат од Комората на сметководители.
Оттаму бараат при донесувањето на законите да се слуша и мислењето на бизнисите кои се најзасеганти со нив.
Претседателот на Комората на сметководители Драган Митковски на денешната прес-конференција рече дека брзите промени посебно во даночната регулатива го зголемуваат ризикот во работењето и го оневозможуваат ефективното даночно планирање на компаниите.
– Да го земеме Закон за данок на личен доход, кој беше донесен и покрај нашето предупредување за штетните ефекти од неговата имплементација, а по една година се одложи неговата примена. Дополнително, од јануари стапуваат на сила измените на Законот за придонеси за задолжително социјално осигурување, со кои придонесите растат за 0,5% со што нивниот кумулативен раст од лани е 1%. Имајќи предвид дека ефективната даночна стапка со вклучени придонеси и данок на личен доход, е веќе 50% на основа на нето платата која вработените ја земаат сметаме дека со ова се става преголем товар на и онака кревкото стопанство – истакна Митковски.
Благоја Грозданов, пак смета дека постојаното менување на законите е тешко да се следи кај малите фирми.
– Mалите и средни фирми кои очекуваме да бидат двигател на економијата немаат на располагање тим на советници кои постојано ќе ги информира и ќе им помага во примената на новата регулатива. Оваа активност најчесто е оставена на сметководителите – вели Грозданов.
Според него проблем со брзо донесените закони е и тоа што често се непрецизни, па отвораат можност за различно толкување и префрлање на надлежностите.
Комората на сметководители предупреди и најавената нова глобална економска криза која се заканува во САД, Европа, но и во нашето соседство.
– Владата треба да го зголеми штедењето и да го намали дефицитот на буџетот, непотребните јавни трошоци и задолжувањето во странство, а да донесе мерки за ублажување на ценовниот удар и со индиректни мерки да им помогне на компаниите што имаат намален извоз – рече Грозданов.
Од Комората апелираат завршните сметки да ги потпишуваат само овластените сметководители, со што покрај одговорноста ќе имаат и соодветни права кои произлегуваат од нивните квалификации.
