Јавното претпријатие за државни патишта гради нов мост на реката Луда Мара во кавадаречкото селото Ваташа. Вредноста на инвестицијата е 480 илјади евра, обезбедени од буџетот на ЈП за државни патишта. Новиот мост треба да биде готов до февруари идната година.
Денеска увид на градилиштето направија министерот за транспорт и врски Горан Сугарески, директорот на ЈП за државни патишта, Зоран Китанов и градоначалникот на Кавадарци, Митко Јанчев.
– Како што забележавме, градежните работи се одвиваат добро и очекуваме новиот мост да биде завршен во предвидениот рок. Во делот на изградбата и реконструкцијата на патната мрежа сакам да споменам дека набрзо ќе започне да се реконструира регионалниот пат Кавадарци – Росоман. Исто така во тек е изградба на експресниот пат од Градско до Прилеп, а до ноември оваа година очекуваме да биде завршена рехабилитацијата на автопатска делница Неготино – Демир Капија – изјави министерот за транспорт и врски, Горан Сугарески.
Директорот на ЈП за државни патишта, Зоран Китанов истакна дека покрај изградбата на овој мост ќе се изгради и пристапен пат до мостот, со цел жителите на с. Ваташа да можат безбедно да се движат.
– Покрај овој проект, започната е и реконструкција на влезот на Кавадарци со средства обезбедени од буџетот на ЈП за државни патишта. Склучен е договор со Светска банка, така да набрзо ќе започнеме да го реконструираме и патот до Росоман. Работиме интензивно, како во Кавадарци, така и во другите општини – рече Китанов,
