Рускиот претседател, Владимир Путин го однесе кинескиот колега Си Џинпинг на палачинки, што, како што пренесуваат руските медиуми е приказ на добри лични односи меѓу двајцата водачи.
Путин и Си јадеа палачинки со кавијар и наздравија со вотка на маргините на економскиот форум во Владивосток.
Москва и Пекинг развија „стратешко партнерство” кое ги одразува нивните заеднички ставови кон „униполарниот” свет, термин што ја означува глобалната доминација на САД, пишуваат медиумите.
Приближувањето е олеснето од добрите лични односи на Путин и Си, кој се смета за најмоќен кинески лидер по времето на Мао Цетунг.
Двајцата лидери досега се состанаа скоро 30 пати, а Путин пред извесно време изјави дека кинескиот претседател е единствениот светски лидер што некогаш го повикал на негов роденден.
