Во кино Фросина во Младинскиот културен центар вечерва во 20 часот ќе се одржи промоција на романот „Барутни облаци“ на Бранислав Ѓорѓевски, во издание на издавачката куќа „Академски печат“.
„Барутни облаци“ е роман кој зборува за човекот против системот, вербата против верата, мирот наспроти војната. Станува збор за ововремена и овдешна дистопија во чиешто средиште се Михаил и Елеонора, млади уметници кои спротивно на сопствената волја се втурнати во вителот на верска војна.
Промотори на романот се Ѕвездан Георгиевски, новинар и колумнист и Сашо Кокаланов, новинар, писател, драматург и колумнист.
Бранислав Ѓорѓевски (32) е роден, живее и работи во Скопје, кадешто во 2009 година дипломира на студиите по нoвинарство на Правниот факултет. „Барутни облаци“ е негов прв роман. Досега има издадено две збирки раскази, „Сите тие краеви“ (2012) и „Северно од сонцето“ (2015) којашто е преведена и издадена и на германски јазик под насловот „Надвор од балканската рута“ (Abseits der Balkanroute)
.
