Тревога за опасност од цунами е издадена утринава на брегот на Средоземно море по силниот земјотресот од 6,4 степени што го погоди јужниот дел на Грција, соопшти европскиот сеизмолошки центар.
Нивото на морето се менува во близина на Грција и се формира цунами, се наведува во пораката испратена на твитер.
Се стравува дека брановите би можело забрзано да пораснат и затоа е побарано од луѓето да останат подалеку од плажите.
Земјотресот со интензитет од 6,4 степени според Рихтер, кој во 01.54 часот по локално време го погоди Јонското Море, со епицентар во морскиот дел на 44 километри југозападно од островот Закинтос, предизвика само материјална штета.
Како што јави дописничката на МИА од Атина, нема информации за жртви или повредени, а предизвикана е голема материјална штета.
Голем дел од островот Закинтос неколку часа бил без електрична енергија, дел од граѓаните ноќта ја поминале на улица, а со одлука на градоначалникот училиштата денеска се затворени.
По големиот земјотрес следеле неколку други со јачина од околу пет степени според Рихтер. Земјотресот бил почуствуван и во Македонија, Малта, Италија, Албанија и Либија.
Грчките острови Закинтос, Кефалонија и Итаки, во 1953 година беа погодени од неколку силни земјотреси, при што животот го загубија над 450 лица, илјадници беа повредени, а беше предизвикана огромна материјална штета.
