Големиот црн ковчег пронајден во Александрија, Египет, кој не бил отворен повеќе од 2.000 години, го привлече вниманието на целиот Интернет каде што луѓето се поделија во две категории – оние што сакаат по секоја цена да дознаат што има внатре и оние што се плашат дека со отворањето на саркофагот ќе се ослободи темна сила над нашата контрола, нешто како приказната во филмот „Мумија“ (Mummy).
Изгледа дека желбата на првата група надвладеа, бидејќи научниците го отворија саркофагот. Исто така имаме и добри вести за втората група – Врховниот совет за антиквитети ги поби сите урнебесни гласини за можни клетви (што настанаа најмногу од хистерични таблоиди во Велика Британија, а од таму се проширија низ целиот свет). Во името на науката, саркофагот се отвори и планетата продолжи да си живее на истиот начин како и претходно.
– Саркофагот е отворен, но сè уште не сме удрени од клетва – шеговито изјавил генералниот секретар на Советот, Мостафа Вазири.
– Во него пронајдовме три распаднати мумии, за кои веруваме дека биле воини. Еден од черепите има знаци за фрактура од остар објект. Исто така, саркофагот беше полн со црвена вода од канализација, што навлегла внатре од пукнатина, па тоа и предизвикало мумиите да се распаднат.
Советот за антиквитети е во процес на тестирање на мумиите со цел да откријат во која ера припаѓале. Тие не веруваат дека биле дел од кралско семејство, бидејќи немало злато или сребрени маски, ниту пак амајлии или статуи кои би укажувале на ова. Исто така нема ни запис на саркофагот на кои стојат нивните имиња.
