Фондот за иновации и технолошки развој (ФИТР) соопшти дека ќе го поддржи учеството на меѓународни натпревари и олимпијади на ученици од тимовите на Друштвото на физичари на Македонија, Сојузот на техничари и технолози на Македонија, Фондацијата за промовирање на иновативно учење, едукација и личен развој Стем Академија и од ОУ „Јохан Хајхрих Песталоци“ од Скопје.
Тимот на учениците физичари од Друштвото на физичари на Македонија, кој ФИТР го поддржа и минатата година на Олимпијадата во Боцвана од каде се вратија со три бронзени медали, во јули ќе се натпреварува на 50-та Меѓународна олимпијада по физика во Тел Авив.
– Талентираните ученци хемичари ќе не претставуваат на 51-та Интернационална Олимпијада по хемија што ќе се одржи во јули во Париз, а ученици од ОУ „Јохан Хајнрих Песталоци“ кои освоија златни и сребрени медали на регионалниот натпревар во Скопје се квалификуваа за учество во глобалниот напревар „World Schollars Cup“ што ќе се одржи во Хаг во јули – соопшти ФИТР.
Тимот Space Walkers, составен од деца кои посетуваат часови по наука, технологија, инженерство и математика во рамки на Стем Академија, благодарение на успехот постигнат во Целје на финалето во Адриа First lego league, натпревар кој е насочен на едукативна роботика, се пласираше на светско првенство на FLL лигата во Либан, што ќе се одржи идниот месец.
Средствата, како што се наведува, се обезбедени од ФИТР со пренамена на тековните трошоци на Фондот. Ова е дел од Програмата за поддршка и развој на таленти што ја развива ФИТР во соработка со УНИЦЕФ.
– Тим од професори, претставници на академската фела и ФИТР неколку месеци работат на изготвување концепт кој треба предложи системско решение кое ќе вклучува инструменти за поддршка на талентираните деца и координирани активности, како и иницијативи на сите релевантни институции – се вели во соопштението од ФИТР.
Оваа иницијатива е произлезена од бројните барања за поддршка на ученици од страна на ФИТР, како и од програмата за поддршка на млади истражувачи која првпат беше објавена во ноември 2017 година.
ФИТР само во изминатата година има инвестирано близу 10 милиони денари во реализација на програми наменети за млади и деца од различни возрасти, со цел поттикнување на нивната критичка мисла и иновативност.
