Палестинските власти ги укинаа платите на пратениците од Хамас во Западен Брег. Тоа е најнова во низата мерки откако ескалираа тензиите помеѓу двете ривалски фракции – Фатах и Хамас.
Палестинскиот претседател Махмуд Абас минатиот месец го расформира Парламентот составен од 132 пратеници, а заменик претседателот на Парламентот, Хасан Креиџех денеска изјави дека сите, освен 48 пратеници, првенствено членови на Хамас, неделава не добиле плата.
Палестински претставници од Фатах се заканија со нови акции против Хамас поради одбивање на организацијата да ја предаде контролата над Појасот Газа.
Тоа се случува во време кога Израел се обидува да го зачува примирјето на таа територија, која ја држи под блокада.
Владата на Абас минатата недела се повлече од граничниот премин Рафах помеѓу Египет и Појасот Газа, што го контролираше врз основа на Договорот за помирување со Хамас од 2017 година.
