Унгарскиот премиер Виктор Орбан испрати писмо до лидерот на италијанската десничарска Лига, Матео Салвини во кое му заблагодарува на напорите да го спречи приливот на илегални мигранти во Европа.
– Ние, Унгарците, никогаш нема да заборавиме дека бевте првиот западноевропски лидер кој се обиде да ги спречи илегалните мигранти да ја преплават Европа преку Средоземно Море – напиша Орбан во писмото, кое на новинарите им го прочита неговиот шеф на кабинетот Берталан Хаваси.
Без разлика на идниот политички развој во Италија и фактот дека припаѓаме на различни групи во Европскиот парламент, „Вас ве сметаме за брат по оружје во борбата да го зачуваме европското христијанско наследство и да ја спречиме миграцијата“, наведува Орбан во писмото.
