Од понеделник треба да почне следењето на инспектори од страна на Град Скопје, најави раководителот на Инспекторатот на Градот, Мирослав Богдановски. Со апликацијата „е-инспектор“, инспекциските лица ќе бидат под лупа постојано за време на работното време, меѓудругото и за нивна заштита.
– Во август заврши тендерот и почнавме со имплементација на договорот. Има десет телефони кои што се пуштени по инспектори во тест фаза, пробен период од десетина дена. Периодот на тестирање завршува, договорено е утре да дојдат задолжените, да се инсталира таа програма на сите 60 телефони и од понеделник да почне функционирањето на е-инспектор. Зошто сепак ова е нова апликација, се јавија некои багови, имавме проблеми со исклучување, апликацијата сама се исклучуваше и слично. Целта ни беше да се надминат неправилностите – рече Богдановски за Плусинфо.
Како што рече тој, ова го прават пред сѐ, поради безбедност на лицата кои вршат инспекција.
– Имаме случаи каде што се напаѓаат инспектори, вака преку тој локатор односно џи пи ес сигнал, ќе знаеме точно на кое место се и веднаш ќе бидат испратени или полиција или останати инспектори. Телефоните имаат копче СОС каде што при стискање веднаш се праќа сигнал во полиција, каде што се лоцира каде е инспекторот и се праќаат најблиску тие единици или патроли од МВР – додаде тој.
Покрај следењето, како што вели тој, со новите телефони ќе се олесни сликањето на записниците, скенирањето, а ќе може да се сликне и за некој проблем од терен и да се прати до посакуваното место.
– Сакаме заштита на инспекторите, меѓутоа покрај другото ние можеме да правиме и оптимизација на нивното работно време и маршутите што се спроведуваат. На пример од точка А до точка Б, од тука да оди до Капиштец, не може до Гази Баба да врти, така што тука ќе имаме и штедење на гориво и слично – рече тој.
Доколку еден инспектор каже дека е на едно место, а џи пи есот вели дека бил на друго, тој може да се соочи со намалување на плата, но и со отказ.
Шеесте телефони се предвидени за 39-те инспектори кои моментално работат, но во план е да се земат уште 15 до 20 лица, така што бројката околу 60 да биде запазена.
