Видео записот за божиќната каланда – коледарска песна „Христос се роди денес“, е веќе во завршна фаза. Се очекува пред самиот празник, видео спотот да биде пуштен во јавноста, информираат на својата веб страница од Бигорскиот манастир.
Песната е во изведба на Верче Милошевска и традицискиот оддел при ДМБУЦ „Илија Николовски – Луј“. Режијата, монтажата и продукцијата на видеото е на Даниел Јовески. Песната е снимена во студиото „Фаме’с“.
Во организација на Здружението „Бадникови поворки“, а со благослов и соработка на Бигорскиот манастир, се направи музички аранжман за древната каланда „Христос се роди денес“. Аранжманот за музиката го направи Владимир Димовски, а во оркестарот музичари учествуваа, на виолина: Владимир Костов, Елена Талевска, Петар Тасески, Ѓоргина Поповска, Марија Јанчулеска, Владимир Цветковски, Коста Андоновски, Бранислав Автовски, Момчило Куфојанакис, Игор Милевски; виоли: Марија Димитријевиќ, Александар Стојчевски, Александар Лаовски; на виолончело: Кирил Јосифов, Паскал Краповски, Љупка Манчевска Каевиќ; на контрабас: Митко Иванов; на кларинет: Петар Христов, на канон: Тимко Чичаковски и на харфа: Симона Богоевска. Диригент и синтисајзер: Иван Еминовиќ.
Со ова, всушност, како што се посочува „Бадникови поворки“ и годинава го одржа ветувањето дека за секој Божик ќе возобновува по една стара коледарска песна.
Од Бигорскиот манастир наведуваат дека во севкупното остварување на овој проект учествуваа над 80 луѓе, меѓу кои познатите македонски актери: Јоана Поповска, Дубравка Киселички, Владо Јовановски, Горан Илиќ, Љупчо Бојковски, Владо Дојчиновски. Костимографијата ја направи Жаклина Крстевска Караѓозоска, а за шминката се погрижија Викторија Бурсак и Маргарита Миновски.
Каландата „Христос се роди денес“ е продолжение на процесот за возобнова на древните божикни традиции, со кои побожно се славело Рождеството Христово. Пеејќи ги Божикните каланди, верниците, особено најмладите, на Бадник го објавувале насекаде со радосно ликување доаѓањето на Божјото Слово на земјата. Но, во тоа празнично возвестување учествувале, се разбира, и возрасните, кои често, организирани во групи заедно со неколку музичари, попладнето на Бадник, оделе од куќа на куќа и пееле каланди. Годинешниов спот го прикажува токму тоа, информираат од Бигорскиот манастир.
Во продолжение текстот на каландата, како и прилогот со изјавите на дел од актерите:
Христос се роди денес
Добровечер, домаќини, ако има во вас желба,
да раскажам за светото раѓање на Христа Бога.
Христос се роди денес во Витлеем јудејски,
небесата се веселат, сета твар се радува.
Во пештера се раѓа, во јасли на животните,
Царот на небесата и Творецот на вселената.
Мноштво на ангели пеат: „Слава во висините“
и достојна за восхит е верата на пастирите.
Од Персија доаѓаат, тројца мудреци со дарови,
ги води светла ѕвезда, без да ги задоцнува.
Во овој дом што пееме, камен да не падне,
домаќинот на куќава, долго жив да биде.
И добра ноќ, одморете, па во црква брзо појдете,
на светата Литургија со многу побожност и радост.
И дома штом се вратите, на трпеза да каснете,
дајте и на сиромаси, за никој да не снема.
Дајте ни нам што пееме, колку има во вас желба,
и Христос Бог наш секогаш помошник да ви биде.
