Институциите да ги расчистат сите нејаснотии, неправилности и можни малверзации околу Сојузот на тутунските здруженија за да нема ниту една дамка во тутунопроизводството кое државата го поддржува и го стимулира, од кое егзистираат 30 000 семејства и од кое годишно се остварува значаен девизен прилив, порача денеска од Прилеп министерот за земјоделство Љупчо Николовски.
Според него, поверениците, како претставници на тутунопроизводителите, мора да си ги добијат своите пари.
Мнистерот за земјоделство потенцира дека со новиот предлог-закон за тутун, освен што се укинуваат евидентните листови, ќе се либерализира и делот за назначувањето повереници.
Воедно информира дека досега во земјава се откупени над 24.000 тони тутун, откупот е при крај и се одвиваше непречено на општо задоволство на тутунопроизводителите. Досега се исплатени околу 80 милиони евра, а субвенциите ќе ги добијат како лани, според календарот на обврските.
