Бројот на работници во индустријата во октомври годинава во однос на октомври лани е намален за 2,2 отсто, додека во периодот јануари – октомври се намалил за 1,4 отсто, објави денеска Државниот завод за статистика.
Во секторот „рударство и вадење на камен“ во октомври годинава во однос на октомври лани е забалежан пад од 3,4 отсто на бројот на работници, во „преработувачката индустрија“ за 2,2 отсто, а во секторот за „снабдување со електрична енергија, гас, пареа и климатизација“ падот изнесува 0,9 отсто.
Според главните индустриски групи, бројот на работници во индустријата во октомври годинава во однос на октомври минатата година, бележи пораст кај „капитални производи“ за 2,4 отсто, а опаѓање има кај „енергија“ за 2,2 отсто, „интермедијарни производи, освен енергија“ за 1,9 отсто, „трајни производи за широка потрошувачка“ за 3,4 отсто и „нетрајни производи за широка потрошувачка“ за 4,4 отсто.
