Со денешната аукција на хартии од вредност Министерството за финансии ќе покрие стари долгови од претходно издадени државни хартии од вредност, кои доспеваат за исплата на 16 и 19 октомври, реагира Министерството за финансии по тврдењето на портпарол на ВМРО-ДПМНЕ Димче Арсовски дека денеска премиерот Зоран Заев и Нина Ангеловска ќе ја задолжат државата за нови 53,6 милиони евра.
„Ова е редовна аукција, најавена во календарот објавен на веб-страната на Министерството за финансии и нема ново нето задолжување. Станува збор за презапишување на претходно издадени државни обврзници, од кои најголем дел се издадени пред пет години“, соопшти Финансии.
Во соопштението се додава дека во насока на стабилизирање на државниот долг, бројот на аукции сега е преполовен во однос на бројот на аукции на претходната Влада и е сведен на две месечно – пракса од која не се отстапува.
„Каматните стапки по кои се издаваат државните хартии од вредност сега се на најниско историско ниво. Тие се неколкукратно пониски во однос на пред неколку години. И со оваа аукција тие се намалени за дополнителни 10 базни поени. Со ова се намалува трошокот на државата за сервисирање на долгот. Стариот долг со повисока каматна стапка се сервисира со значително пониска каматна стапка со денешната аукција на ДХВ. Што се однесува до висината на јавниот долг, на 31.12.2016 долгот изнесуваше 48,8 отсто од БДП додека на 30.06.2019 изнесува 46,7 отсто од БДП“, се наведува во соопштението од Министерството за финансии.
