Пратениците ја почнаа расправата за предлогот на закон за данок на личен доход, со кој всушност се воведува прогресивен данок. Предложено е законот да се донесе во скратена постапка.
Како праведно решение го оцени овој закон министерот за финансии Драган Тевдовски, додека според опозицијата ова е лошо законско решение и катастрофа за македонската економија.
– Се предлага воведување прогресивен данок на доход со цел обезбедување на поголема праведност на даночниот систем – рече Тевдовски.
Освен даночната стапка од десет проценти се воведува и стапка од 18 отсто која ќе се однесува на даночна основа која надминува еден милион и осумдесет илјади денари на годишно ниво, односно 90 илјади денари на месечно ниво. За даночната основа до еден милион и осумдесет илјади годишно и до 90 илјади месечно останува примената на постојната даночна стапка.
Исто така се предлага и оданочување на доходот од закуп, подзакуп, дивиденди, капитални добивки, игри на среќи и друг доход да се врши со примена на единствена даночна стапка од 15 отсто.
– Дополнително со предлог-законот се врши и зголемување на соодносот на даночното намалување, односно ослободување што ќе важи на платите и пензиите со што даночното побарување кај пензиите ќе биде помало отколку што е со постојниот закон – рече Тевдовски и нагласи дека ова решение е дополнителен чекор, што Македонија треба да го направи за да влезе во редот на земји кои имаат праведно оданочување.
Тој додаде дека рамниот данок бил карактеристика на поранешни социјалистички земји и оти голем број од тие земји преминале кон прогресивен данок.
Димитар Стевананџија од собраниската говорница порача дека ВМРО-ДПМНЕ првиот ден по, како што рече, победата на следните парламентарни избори ќе го поништи ова законско решение и повторно ќе функционира рамниот данок.
Тоа, како што рече го бараат и домашните и странските инвеститори.
– Имаше јавна дебата, а вашите колеги поранешни министри од СДСМ ви пратија една порака, овој данок е катастрофа за македонската економија. Истата порака ви ја пратија и Стопанската комора на германските инвеститори во РМ и на американските инвеститори, рече тој.
За неговиот сопартиец Антонио Милошоски воведувањето прогресивен данок е антиреформа.
– Немаше ниту еден субјект во државата освен Тевдовски и пратениците на СДСМ кои излегле и кажале дека ова со зголемување на даноците е добар чекор. Многу луѓе сметаат дека овој данок само ги оптоварува нивните бизниси. Многу луѓе се чувствувата изневерени бидејќи сметаат дека за некој начин се работи за изборна измама – рече Милошоски.
Тој напомена дека со новите мерки ќе бидат погодени претприемачи, менаџери, професионалци на брзорастечки индустрии, информатички технчари и други инженери.
Расправата продолжува по 15 часот, до кога трае пазузата, што ја прогласи претседателот на Собранието, Талат Џафери.
