Ги подобруваме условите за работа на полициските службеници, соработуваме со синдикатите
Раководство на МВР e отворено за соработка со синдикатите, без оглед на репрезентативноста, и тоа се гледа не само по бројните средби туку и со преземените активности, изјави портпаролот на Министерството за внатрешни работи Тони Ангеловски, откако Независниот полициски синдикат на полицијата побара да биде вклучен во социјалниот дијалог.
– Секој реален предлог кој доаѓа од синдикалните организации за подобрување на условите за работа на полициските службеници го прифаќаме и реализираме. Јавноста во изминатиот период беше сведок на реновирањето на десетина полициски станици и други објекти, како и набавка на униформи и друга опрема за да се овозможат подобри услови за работа на полициските службеници. Минатата недела нови униформи доби Единицата за специјални задачи, а деновиве се дистрибуираат униформите и за други полициски службеници – рече Ангеловски.
Тој најави дека од 1 декември оваа година ќе бидат зголемени и платите на полициските службеници.
– Потенцираме дека и натаму интензивно ќе вложуваме во подобрувањето на условите за работа на полициските службеници, затоа што на тој начин ќе ги подобриме и резултатите во работата, од што бенефит ќе имаат граѓаните на Република Македонија – додаде Ангеловски.
Тој информира дека Министерството за внатрешни работи во периодот од јуни 2017 година до сега постојано работело на подобрување на условите за работа на полициските службеници.
