Москва ќе одговори позитивно доколку добие официјална понуда од Вашингтон да организира средба меѓу претседателите на Русија и САД, Владимир Путин и Доналд Трамп, за време на самитот на Г20 во Осака, изјави денеска рускиот министер за надворешни работи, Сергеј Лавров.
– Ние, секако, ги слушнавме изјавите на Трамп дека очекува да се сретне со претседателот Путин, во рамки на Самитот на Г20 во Осака. Ако добиеме таков предлог, ние, се разбира, ќе одговориме позитивно – рече Лавров.
На заедничката прес-конференција со американскиот државен секретар Мајк Помпео, Лавров рече дека средбата на двајцата претседатели била и една од темите на нивниот разговор во Сочи.
Помпео денеска, на средбата со рускиот колега Лавров, рече дека Трамп е посветен на подобрување на односите со Русија.
Тој додаде дека двете земји не мора да се согласуваат за сè, туку дека има простор за соработка, особено во областа на антитероризмот и борбата против нуклеарното оружје.
Самитот Г20 ќе се одржи на 28 и 29 јуни во Осака
Фото: EPA/EFE /SERGEI ILNITSKY
