Издавачката куќа „Агора“ од Нови Сад ја објави стихозбирката „Лавиринт“ од македонскиот поет Ристо Лазаров на српски јазик. Оваа книга која во Скопје излезе пред две години лани е објавена и на чешки јазик, а веќе е искажан интерес за превод и на други јазици.
Книгата содржи 50 песни и неа авторот на поговорот, професорот Ферид Мухиќ ја нарекува поетска ревизија на архетипските митови. Класичните антички митови, оценува Мухиќ, од Тројанската војна и сите најважни херои и ликови кои одиграле клучна улога во овој настан опеан од Хомер, Казаров ингениозно ги вклучува во своите апдејтирани, осовременети опсервации, ги адаптира и ги контекстуализира , ту во најширокиот контекст на карикирање, ту сосема ги локализира на препознатливи ликови и настани од нашето секојдневие, заведливо и интелигентно водејќи не низ светот што постапно се оформува во еден вистински лавиринт во кој, сфаќаме, дека сме затворени и од кој нема ниту спас, ниту излез.
Пред „Лавиринт“, годинава во Белград беше објавена стихозбирката „Езерска“ од Ристо Лазаров, а во Бања Лука книгата песни „Цедена“.
