Конфедерацијата на слободни синдикати не се согласува со зголемувањето на платите во јавната администрацијата од септември следната година, и бара тоа да се случи уште во јануари. За нив е неприфатливо и зголемување на платите за пет проценти, како што е предвидено во Предлог-буџетот за 2019 година.
Најавуваат протести што ќе почнат во Прилеп на 15 декември, а ќе завршат со централен протест во Скопје. Не ја исклучуваат и можноста од генерален штрајк на јавната администрација.
– Не се согласуваме со зголемување на платите од септември и бараме тоа покачување да биде од јануари 2019 година и не се согласуваме со процентот што е предвиден во Предлог-буџетот од пет проценти. Не се согласуваме бидејќи минатата година имаше покачување на минималната плата и согласно законите во Македонија требаше да се направи усогласување со колективните договори, но тоа не се направи и се создаде едно порамнување на платите со носителите на дејноста и не се задржа распонот на платите по вертикала во јавниот сектор. Сето тоа доведува до напуштање на стручните кадри од јавната администрација – рече претседателот на КСС Благоја Ралповски на денешната прес-конференција.
КСС не се согласува и со најавениот трансфер на вработени од јавниот во приватниот сектор и смета дека парите што треба да се наменат за овој трансфер може да се пренаменат за преквалификација на јавните службеници.
Од КСС бараат и исплата на К-15 во јавниот сектор, кој сега е задолжителна обврска за приватниот сектор.
