Францускиот институт во Скопје и Националната галерија на Македонија во четврток во 20 часот, во Мала Станица ќе ја отворат изложбата на најзначајниот француски фотограф во 19-тиот век и татко на современата фотографија, Надар.
Изложбата, насловена „Славните портрети на Надар“, официјално ќе ја отворат Дита Старова-Ќерими, директорка на Национална галерија на Македонија, Кристијан Тимоние, Амбасадор на Франција во Македонија и Лор Верон, кустос во Музејот Jeu de Paume.
Гаспар-Феликс Турнашон (1820 – 1910) станува Надар на дваесетгодишна возраст, а особено е познат по портретите на големите мислители, писатели и уметници од тој период: Теофил Готие, Марселин Деборд-Валмор, Жерар де Нервал, Гистав Доре, Бодлер и многу други.
Оваа екслузивна изложба од 41 репродукција е овозможена од Музејот Jeu de Paume, а е поддржана од Зегин и од Охридска банка – Société générale.
Изложбата ќе биде отворена до 27 јануари 2019 година.
