Аргентинскиот судија ги обвини вдовицата и синот на колумбискиот нарко-бос Пабло Ескобар дека се дел од криминална организација којашто се занимава со перење пари, соопштија во вторникот аргентинските медиуми.
Меѓу обвинетите е и поранешниот колумбиски фудбалер Маурисио Серна. Викторија Енао, Хуан Пабло Ескобар Енао и Серна се обвинети дека биле посредници во Аргентина за колумбискиот нарко дилер Хосе Пједраита и дека учествувале во перењето на пари преку трговија со недвижности, како и во едно познато кафуле.
Судот во Аргентина наложи и да им се заплени имотот чијашто во вредност од милион долари.
Вдовицата на починатиот нарко-бос го промени името во Марија Изабел Сантос Кабаљеро, а неговиот син во Хуан Себастијан Марокин Стантос, по смртта на Ескобар во 1993. година. Тие побегнаа во Мозамбик кога Ескобар беше убиен од полицијата, а подоцна се преселија во Аргентина.
Хуан Пабло претходно зборуваше дека нема да појде по стапките на неговиот татко и наместо да стане како Пабло Ескобар, тој требаше да биде писател, архитект и дизајнер. Реалноста, сепак, го демантирала.
Уште во 1999-та година аргентинските медиуми известија дека Викторија и Хуан Пабло се приведени поради сомнение дека перат пари, иако Викторија тоа во неколку наврати го демантираше.
„Јас сум затвореник во Аргентина само затоа што сум Колумбијка. Тие се обидуваат да му судат на духот на Пабло Ескобар затоа што сакаат да докажат дека Аргентина се бори против трговијата со дрога“, истакна таа.
Од семејството во неколку наврати се обиделе да го регистрираат презимето Ескобар како бренд, но не успеале во тоа. Инаку, ќерката на Ескобар, Мануела живее во Северна Каролина во САД под друго име, а работела како електроинжинер.
