Заев: Ќе обезбедиме решенија за пласманот на земјоделските производи

Светска банка обезбеди 30 милиони евра да помогне во изведба на откупно – дистрибутивните и преработувачки центри низ државата со кои ќе ги максимaлизираме приносите и профитабилноста на земјоделците, изјави премиерот Зоран Заев, одговарајќи на пратенички прашања во Собранието.

Заев, во вториот дел од собраниската седница посветена на пратенички прашања, посочи дека Владата е фокусирана да обезбеди решенија за пласманот на земјоделските производи, што е едно од важните прашања за приходите на земјоделците.

– Втората работа што ја правиме во тој дел се посебните услови преку инвестициските програми за земјиште. Веќе една фаза помина. Сега и Валандовско-богдански-дојранскиот регион е еден од регионите што ќе бидат во наредните фази за давање под концесија земјиште за изградба на преработувачки капацитет или откупен пункт. Следуваат втора и трета фаза, до три и над три хектари површини кои се распределуваат – објасни Заев.

Тој посочи дека третата можност за финансирање изградба на преработувачки или дистрибутивни центри е преку ИПАРД програмата.

– Верувам дека со реален фокус и изградба на откупни пунктови и преработувачки капацитети и дистрибутивни центри дополнително ќе помогнеме земјоделието повторно да биде достоинствена гранка. Верувам многу во оваа политика и сум ја ветувал. Доаѓам од земјоделски регион и сегашниот министер, а верувам и еден од критериумите за поставување на идниот министер ќе биде неговата лична верба во оваа работа, затоа што верувам дека како политика и политичари ќе бидеме успешни ако навистина решиме колку што може повеќе проблеми во земјоделието поврзани со пласманот – изјави Заев.

Премиерот нагласи дека ваквите постапки ќе почнат ова лето и веќе на локациите доделни во права фаза ќе почне да се градат центрите.