Семејството на француското момче што беше спасено додека висеше од балконот на четвртиот кат од човекот што го нарекоа „париски Спајдермен“ сега ги нарекува постапките на Мамуду Гасама „неверојатни“.
Гасама е „навистина херој“, рече бабата на 4-годишникот за Би-Би-Си за мигрантот од Мали, кој за само неколку секунди се искачи по фасадата на зградата во Париз и го спаси момчето.
Детето, наводно, отишло да живее со својот татко пред само неколку недели, а мајка му и брат му требало да им се приклучат од островот Реунион во јуни. Консиержот на зградата за БФМТВ рече дека таткото всушност живее на шестиот кат. Според некои нови информации, момчето паднало два ката пред да се фати за балконот на четвртиот кат.
Францускиот обвинител вели дека татко му го оставил момчето само за да оди до продавница и застанал на пат кон дома за да игра Покемон гоу, објави Си-Ен-Ен.
Таткото, кој во неделата беше ставен во полициски притвор, може да се соочи со две години затвор ако биде осуден под обвинение дека „не ги исполнил родителските обврски“, според Њујорк тајмс.
