Ѓоко Танески, Наташа Малинкова, Мартинијан Кириловски, Џокси, Тајфата и Димитар Адоновски, Дани Димитровска, Антонија Гиговска се само дел од позвучните и поискусни имиња на „Макфест 2018“.
Покрај подготовките за штипската „Пастрмалијада 2018“, во тек се и финалните подготовки за 33-тото издание на фестивалот на музика „Макфест 2018“. Штип е подготвен да оддржи уште едно издание на „Макфест 2018“, кое треба да започне на 4 октомври.
– Песните и авторите се веќе познати. Вкупно 32 композиции, познати имиња од македонската забавна сцена, но и нови лица кои бараат место на естрадата. Следи фаза на изработка на ЦД со сите песни, така што до почетокот на фестивалот ќе бидат реализирани сите планирани задачи – вели Владимир Дојчиновски, уметнички директор на „Макфест 2018“.
Од технички аспект, веќе се работи на логистичкиот дел на фестивалот.
– Традиционално, големата сала на Домот на културата „Ацо Шопов“ ќе биде комплетно подготвена за фестивалот. Се договараат последните финеси околу сцената, звукот, преносот и веќе од идната недела комплетно влегуваме во реализација на „Макфест“. Останува публиката и Македонија да слушнат нови 32 композиции од домашната продукција – изјави Кирил Панајотов, технички раководител на „Макфест 2018“.
Традиционално, на првата прес-конференција на 25 септември ќе биде извлечен и редоследот за изведувачите на првата фестивалска вечер. Преносот на фестивалот е на првиот канал на МТВ со почеток во 20.30 часот.
Панајотов пртеходно најави дека телеволтинг повеќе нема да има, ќе гласа публиката, зашто таа секогаш знаела добро да избере.
