Изградба на магистрален гасовод меѓу Македонија и Грција и изградба на секундарна гасоводна мрежа во општините најави министерот за финасии Драган Тевдовски на Годишните средби на Европската банка за обнова и развој (ЕБОР) во Јордан.
Тевдовски рече дека ЕБОР е заинтересирана за финансирање на двата проекта.
– ЕБОР во моментот финансира два проекта во областа на енергетската инфраструктура во Македонија. Планираме во блиска иднина, да ги зголемиме капиталните инвестиции, пред се во енергетиката. Тука зборувавме и имаме начелна согласност за учество на ЕБОР во два значајни проекта. Првиот е за изградба на секундарна гасификациска мрежа во повеќе општини во различни региони. Големината на проектот е проценета на околу 50 милиони евра. Покрај кредитна линија за овој проект побаравме и грант средства кои треба да обезбедат и изработка на техничка документација на проектот- рече Тевдовски.
Тевдовски посочи дека вториот проект од областа на гасификацијата за кој се дискутирало на средбите е интерконекција со гасовод на Македонија и Грција.
-Тоа е важен проект. Веќе имаме добиено писмо за интерес од страна на Европската инвестициска банка за финансирање на проектот, а има интерес и од грчката страна за негова реализација- истака Тевдовски.
