Припадниците на српските Вооружени сили денеска изведоа тактичка воена вежба со боево гаѓање под име „Векот на победникот 1918 – 2018“, во чест на стогодишнината од победата во Првата светска војна.
Вежбата се спроведе на десет локации со учество на 8.000 припадници на Копнената армија, Военото воздухопловство, Речната флота и други единици, а на неа учествуваа 100 тенкови, 100 оклопни борбени возила, 100 артилериски и ракетни систем и 24 авиони и хеликоптери, при што беа употребени околу 103 тони боева муниција и средства.
На вежбата присуствуваше комплетниот државен врв на Србија, на чело со претседателот Александар Вучиќ, кој на полигонот Пасуљански ливади изјави дека во регионот само Романија има поголема армија од Србија.
– Ние и Унгарците сме тука некаде, а сите други се далеку, далеку зад нас. Се разбира дека Грција има огромна војска, тоа не се споредува, но сите останати од просторот на поранешна Југославија … Ние драматично ја зајакнуваме нашата армија, нашите чекори не се од милји, тоа се чекори од седум милји – изјави Вучиќ за Радио Телевизија Србија.
Тој најави дека во 2019 година ќе можат да се видат големите инвестиции во армијата.
– Кога станав министер за одбрана, имавме еден неисправен МИГ 29, а денес имаме осум” дваесет и деветки “кои летаа, имаме вкупно 10 такви, видовте тенкови, најмногу досега, 100 тенкови учествуваат во целата вежба“- рече Вучиќ.
Тој додаде дека следната година очекува од Русија нови оклопни возила, помодерни и уште 30 тенкови, како и првите беспилотни летала од Кина во вредност од околу 30 милиони евра.
Зголемување на платите од девет проценти, најави Вучиќ, а за членовите на разузнавачката Безбедносно-информативната агенција (БИА) просечна плата од 850 евра.
Како што најави Началникот на Дирекцијата за разузнавачко-извидувачки работи на Генералштабот на Вооружените сили на Србија, генерал-мајор Илија Тодоров вежба „Векот на победникот 1918 – 2018“, е една од најголемите уште од времето на ЈНА.
ФОТО: EPA / FLORIAN WIESER
