Пазарот на капитал треба да биде една од движечките сили на пазарните економии и треба да обезбедува ликвидност на националната економија, остварување профитабилност и овозможување проширена репродукција во областа на производството и прометот, како и сигурност при пласирањето на слободниот капитал. Во нашата законска регулатива, лицето што сака да стекне повеќе од 25 отсто од хартиите од вредност со право на глас издадени од определено акционерско друштво (да достигне контролен праг за преземање), должно е претходно да даде понуда за преземање, во согласност со одредбите на Законот за преземање на акционерските друштва.
Во најголемиот број на европските законодавства овој праг за преземање е поставен на 30 отсто од хартиите од вредност со право на глас (вклучувајќи ги, на пример, Германија, Австрија, Обединетото Кралство, Финска и Шпанија), па во определени законодавства достигнува дури и 1/3 од хартиите од вредност со право на глас (Норвешка, Грција, Романија).
Притоа треба да се разграничи што е целта на постапката за преземање на акционерски друштва (која, патем, се базира на европската Директива 2004/25/ЕЗ) – да се обезбеди јавност и транспарентност во процесот на преземање на акционерски друштва, така што ќе се обезбеди заштитата на малцинските акционери во таа постапка, преку нивен рамноправен третман, на начин што секој акционер што е заинтересиран би можел под еднакви услови да ги продаде своите акции во ситуација кога некој се стекнува со контрола во друштвото, а не кога хипотетички би можело да се стекне со преовладувачко влијание во акционерското друштво (ова од причина што доколку биде објавена понуда за преземање, понудувачот е должен да ги откупи сите акции од лицата што ќе дадат изјава за прифаќање на понудата за преземање, сè до прагот од 75 отсто од хартиите од вредност со право на глас).
Впрочем, во Германија, на пример, со релевантното законодавство воопшто не е уреден праг за кворум на работа на собранието на акционерското друштво, а сепак прагот за преземање е уреден на повисоко ниво отколку во нашето законодавство.
Затоа, во Стопанската комора на Македонија поднесовме иницијатива, постапката за преземање на акционерските друштва да биде регулирана во согласност со добрите практики од европските законодавства и прагот за преземање на акционерско друштво да биде подигнат, така што истиот би изнесувал 30 отсто од хартиите од вредност со право на глас. Сметаме дека ваквата промена ќе придонесе за раздвижување на пазарот на капитал во земјата и унапредување на стандардите за доброто корпоративно управување.
ПС. Народната банка на Република Македонија покажува дека е на висината на задачата за поддржување на економската политика и финансиската стабилност на земјата – продолжувањето на трендот на намалување на основната каматна постапка е за поздравување, од причина што ваквиот потег треба да придонесе за обезбедување на засилена поддршка за инвестициските активности на реалниот сектор, кои полека почнаа да добиваат на интензитет.
