Шестиот игран филм „Врба“ на Милчо Манчевски вечер ќе има македонска премиера истовремено во Скопје, Битола, Охрид и Штип. Официјалната премиера за домашната публика ќе биде во Филхармонијата од 20.30 часот, а премиери во Скопје ќе има и во кината „Милениум“ и „Синеплекс“ со што почнува и редовното киноприкажување на филмот.
Светската премиера беше на 19 октомври во официјалната селекција на Филмскиот фестивал во Рим. „Врба“ е филм е а лојалност, љубов, доверба и мајчинство, кој спојува приказни за три млади мајки – едната приказна се случува во 17 век, а другите две се современи. Тие се надополнуваат, а во исто време се и контраст една на друга.
Според режисерот Манчевски, секој филм создава свет и гледачот го сака филмот ако успее да влезе во него и ако тој некаде го однесе.
-Тој свет може да биде реалистичен и денешен, како што е дел од филмот, а може да биде средновековен или од друго минато време. Интересно е да откриваш колку биле различни, а исти луѓето од тоа време и колку тоа што ние го знаеме како историја е, всушност, некоја романтизирана фикција. Тоа е една од убавите придобивки во правењето ваков филм, рече Манчевски на прес-конференција по повод македонската премиера.
„Врба“ ќе има две верзии – машка и женска и на публиката ќе и бидат понудени двете (машката верзија ќе се прикажува во „Милениум“, а женската во „Синеплекс“). Но тие не се разликуваат многу и, како што рече режисерот, „Врба“ не е ни женски, ни машки филм, туку е филм за луѓе. Не откри која од двете верзии ќе биде прикажана на официјалната премиера во Филхармонијата.
Филмот е македонско-унгарско-белгиска копродукција во која учествува и Албанија. Се снимаше лани во октомври и ноември во Мариово, Преспа, Трескавец и во Скопје. Веќе има покани за фестивали, продукцијата „Банана-филм“ е во преговори со партнери за продажба кои ќе обезбедат дистрибуција и понатамошен живот на филмот.
Во актерската екипа се: Наталија Теодосиева, Сара Климоска, Камка Тоциновски, Никола Ристовски, Ненад Нацев, Петар Мирчевски, Благој Чоревски, Ратка Радмановиќ, Ана Костовска, Лазе Манасковски, Катина Иванова, Кире Ѓоревски, Адем Карага, Јелена Јованова-Периќ. Музиката ја потпишува Кирил Џајковски, дизајнер на продукција е Дејвид Манс, а директор на фотографија е Тамаш Добош.
